कुद्रेमानी पीडीओवर तातडीने कारवाई करा; अन्यथा आंदोलन!

 “पीडीओवर तातडीने कारवाई करा; अन्यथा आंदोलन!”

कुद्रेमानी ग्रामस्थांचा जिल्हाधिकाऱ्यांना निवेदन  — निधी गैरवापर, भ्रष्टाचाराविरोधात संतप्त नागरिक

कुद्रेमानी (ता. बेळगाव) :कुद्रेमानी ग्रामपंचायतीतील अनुसूचित जाती-जमाती विकास निधीतील भ्रष्टाचार, मनमानी आणि अन्यायकारक कारभाराविरोधात ग्रामस्थांचा संताप उसळला आहे. निधीचा उघडपणे गैरवापर करून दलित वस्त्यांमध्ये मूलभूत सुविधा न पुरवता हा निधी अन्यत्र खर्च करण्यात आला असल्याचा आरोप ग्रामस्थांनी केला आहे.

या सर्व प्रकाराची चौकशी करून ग्रामविकास अधिकारी (पीडीओ), सचिव आणि ग्रामपंचायत सदस्यांवर कठोर कारवाई करण्यात यावी, अशी मागणी ग्रामस्थांनी जिल्हाधिकारी व जिल्हा पंचायत मुख्य कार्यकारी अधिकाऱ्यांकडे केली आहे.

“आठ दिवसांत कारवाई न झाल्यास तीव्र आंदोलन उभारू,” असा इशारा ग्रामस्थांनी सोमवारी दि. १० रोजी पर्यंत दिला.

पीडीओ नेहमी गैरहजर!

ग्रामस्थांनी यावेळी तक्रार केली की, पीडीओ नेहमीच अनुपस्थित असतात. ते कधी येतात आणि कधी जातात, हे ग्रामस्थांना माहीत नसते. ग्रामपंचायतीतील सीसीटीव्ही कॅमेऱ्यांची दिशा मुद्दाम बदलण्यात आली आहे, अशीही माहिती ग्रामस्थांनी दिली.

ग्रामस्थांनी दिलेल्या निवेदनात नमूद केले आहे की, दलित वस्तीतील विकास कामांकडे पूर्णतः दुर्लक्ष करण्यात आले आहे. रस्ते, गटारे आणि पाणीपुरवठा यांसारख्या मूलभूत सुविधांचा गंभीर अभाव आहे. घराचे उतारे, व्यवसाय परवाना, नाव नोंदणी, पोल्ट्री परवाना यांसाठी ग्रामपंचायत कार्यालयात ५,००० ते ६५,००० रुपयांपर्यंत अवाजवी रक्कम उकळण्यात येत असल्याची तक्रार करण्यात आली आहे.

ग्रामस्थांचे म्हणणे आहे की, “गावातील सामान्य आणि गरीब नागरिकांची प्रचंड फसवणूक होत आहे. शासनाच्या नावाखाली लूट सुरू आहे. या सर्व प्रकारावर तात्काळ चौकशी करून दोषींवर कठोर कारवाई झाली पाहिजे.”

🏢 जिल्हाधिकाऱ्यांकडे निवेदन

ग्रामस्थांनी दिलेले निवेदन जिल्हाधिकाऱ्यांच्या अनुपस्थितीत शिरस्तेदार एस. एम. परगी यांनी स्वीकारले. त्यानंतर जिल्हा पंचायत मुख्य कार्यकारी अधिकारी राहुल शिंदे, तालुका पंचायत कार्यकारी अधिकारी यशवंतकुमार आणि समाजकल्याण अधिकारी यांनाही निवेदनाची प्रत देण्यात आली.

बैठकीत उपस्थित ग्रामस्थ यावेळी महेश नाईक, चंद्रकांत तरवाळ, एकनाथ कांबळे, वाय. व्ही. तरवाळ, वैशाली तरवाळ, संदीप तरवाळ, सद्दाम मुल्ला, यल्लप्पा तरवाळ, लक्ष्मण कांबळे, सातेरी कदम, गोपाळ चौगुले आदींसह मोठ्या संख्येने ग्रामस्थ उपस्थित होते.

🔥 कुद्रेमानी ग्रामस्थांनी आता स्पष्ट केले आहे की, भ्रष्टाचाराविरुद्धचा हा लढा ते शेवटपर्यंत लढणार आहेत — “न्याय मिळेपर्यंत माघार नाही!”